daricha aa.ine par khul raha hai
mujhe apne se bahar jhankna hai
akela TuuTi kashti par khaḌa huun
kinara duur hota ja raha hai
use pahchanna asan nahin jo
hava ka rang paani ka maza hai
kahin andar hi TuuTe honge alfaz
abhi tak tera lahja chubh raha hai
vo apne doston ke darmiyan hai
ya mere dushmanon men ghir gaya hai
kisi ne aa.ine par honT rakh kar
achanak shauq ko bhaḌka diya hai
ḳhuda-e-lam-yazal tere liye to
jo hona tha vo goya ho chuka hai
vo kaise azma.ega kisi ko
jo pahle hi se sab kuchh janta hai
Leave a Reply