Nomaan Shauque
jaane kis ummid pe chhoḌ aa.e the ghar-bar log
nafraton ki shaam yaad aa.e purane yaar log
vo to kahiye aap ki ḳhushbu ne pahchana mujhe
itr kah kar jaane kya kya bechte attar log
pahle mangin sar-bulandi ki dua.en ishq men
phir havas ki chakari karne lage bimar log
aap ki sada-dili se tang aa jaata huun main
mere dil men rah chuke hain is qadar hushyar log
is javan-mardi ke sadqe ja.iye har baat par
sar kaTane ke liye rahte hain ab tayyar log
phailta hi ja raha hai din-ba-din sahra-e-ishq
ḳhaak uḌate phir rahe hain sab ke sab bekar log
badshahat ho na ho lekin bharam qaa.em rahe
har ghaḌi ghere hue baiThe rahen do-char log
Leave a Reply