dil ko har aish se begana bana kar chhoḌa
tum ne aḳhir ise divana bana kar chhoḌa
do nigahon ka tasadum to koi baat na thi
us ka bhi logon ne afsana bana kar chhoḌa
sehn-e-gulshan men tarab-ḳhez bahar aate hi
ham ne har phuul ko paimana bana kar chhoḌa
saikḌon tarah ke but is men ikaTTha kar ke
ka.aba-e-dil ko bhi but-ḳhana bana kar chhoḌa
alam-e-shauq men parvaz ke matvalon ko
azm-e-bebak ne parvana bana kar chhoḌa
dil ka thoḌa sa lahu is men mila kar ham ne
ashk-e-be-dard ko durdana bana kar chhoḌa
‘mansha’ is daur men hasti ki giranbari ne
achchhe-achchhon ko bhi divana bana kar chhoḌa
Leave a Reply