alam ma.aal agar hai to phir ḳhushi kya hai
koi saza hai gunahon ki zindagi kya hai
hamen vo yuun bhi bil-aḳhir miTa.enge yuun bhi
sitam ke ba.ad karam bhi to hai abhi kya hai
nizam-e-bazm-e-do-alam hai intishar-agin
nigah-e-dost men asar-e-barhami kya hai
kisi maqam pe bhi mutma.in nahin nazren
ziyan hai zauq-e-tajassus ka agahi kya hai
namaz-e-ishq jo shamil nahin ibadat men
fareb-e-kufr sarasar hai bandagi kya hai
badal ga.i na agar baghban ki niyyat hi
chaman ka rang badalne men der hi kya hai
guzar ga.i hai shab-e-gham yaqin nahin aata
sahar numud nahin hai to raushni kya hai
mata-e-husn-e-do-alam se bhi siva kahiye
qamar-jamal hai tasvir aap ki kya hai
jo sehr-e-husn ki tasir ka nahin qaa.il
tiri nazar se vo puchhe ki sahiri kya hai
kisi ka husn kahan apna zauq-e-did kahan
kisi ke jalvon se nazron ki hamsari kya hai
qadam qadam pe diya hai fareb rahbar ne
jo rahbari use kahiye to rahzani kya hai
hamare dil pe uchaTti nazar hi Daal kahin
tujhe ḳhabar to chale soz-e-ashiqi kya hai
hamin ne dil men jagah di hamen pe mashq-e-sitam
ye dosti hai to ai dost dushmani kya hai
bahar aa.i hai ab aap bhi chale aa.en
bahar ko bhi ḳhabar ho shaguftagi kya hai
vafa ka naam baḌa ho to ho ‘rishi’ varna
jafa-e-dost men bhi lutf ki kami kya hai
Leave a Reply