dilon ko toḌne vaalo tumhen kisi se kya
milo to aankh chura lo tumhen kisi se kya
hamari laghzish-e-pa ka ḳhayal kyuun hai tumhen
tum apni chaal sambhalo tumhen kisi se kya
chamak ke aur baḌhao miri siyah-baḳhti
kisi ke ghar ke ujalo tumhen kisi se kya
nazar bacha ke guzar jaao meri turbat se
kisi pe ḳhaak na Daalo tumhen kisi se kya
mujhe ḳhud apni nazar men bana ke begana
jahan ko apna bana lo tumhen kisi se kya
qarib-e-naza.a bhi kyuun chain le sake koi
naqab ruḳh se uTha lo tumhen kisi se kya
Leave a Reply