duniya men yahi chor banata hai asas ko
allah kare qata kahin dast-e-havas ko
dil deta huun main qamat-e-dil-dar ko apna
latkata huun main nakhl-e-mohabbat men qafas ko
jaisa ki ye dil dam-e-mohabbat men phansa hai
kam dekhta huun murgh-e-giraftar-e-qafas ko
nikle hain khat-o-khal lab-e-yar ke nazdik
allah ne diya shahd-o-shakar mor-o-magas ko
daudati hai ye ruuh miri jism ko har-su
asvar udata hai zamane men faras ko
zakhm-e-dil-e-shaida hua achchha na masiha
khayyat-e-azal sil na saka chak-e-qafas ko
rahte the ham-aghosh javani men buton se
is piiri ke aate hi tarasne lage mas ko
kab pech se is rishtha-e-ulfat ke chhutunga
todunga na jab tak ki main is tar-e-nafas ko
bimari-e-ulfat se jo main bach gaya naseh
tal jaunga ab ki kahin do-char baras ko
daman ka nishan hai na gareban ka pata hai
ai dast-e-junun manta huun main tire bas ko
sayyad jo dekhe mujhe ulfat ki nazar se
gulzar se behtar kahin samjhun main qafas ko
ai dil kabhi kahne ka nahin raz-e-mohabbat
is dasht men dauda na tabiat ke faras ko
dil deta hai us tifl-e-pari-zad ko nadan
kyuun ‘muntahi’ shoale se bhidata hai tu khas ko
Leave a Reply