kahte hain sun ke majra mera
tum se kis roz rabt tha mera
nama-bar us ne to kaha sab kuchh
tu ne bhi haal kuchh kaha mera
ab to khvahan visal ka bhi nahin
kuchh ajab hai muamla mera
aur kis ko sunate ho mujh ko
aur kis ka ye zikr tha mera
ye bhi kya baat aai us din ki
ye bhi kahiye qusur tha mera
mujh se phir puchhne se kya hasil
gar samajhte ho muddaa mera
kuchh kisi baat ka khayal bhi hai
ghair ke samne gila mera
dekh kar us ka phera lena munh
aur hasrat se dekhna mera
kuchh to baais hai mere aane ka
kuchh to tum se hai vasta mera
bevafa kahte hain sabhi tum ko
kahiye is men qusur kya mera
aisi baten to ghair ki hongi
aap ne naam le liya mera
haal sun ke mira na ye tu kah
ek hi haal hai tira mera
be-qarari se shab kati hogi
aisa kis din khayal tha mera
kis ne betab kar diya mujh ko
kaun aram le gaya mera
dam-e-marg aa ke puchhte hain ‘nizam’
ab to bakhsha kaha suna mera
Leave a Reply