hava ki Dor men TuuTe hue taare piroti hai
ye tanha.i ajab laḌki hai sannaTe men roti hai
mohabbat men laga rahta hai andesha juda.i ka
kisi ke ruuTh jaane se kami mahsus hoti hai
ḳhamoshi ki qaba pahne hai mahv-e-guftugu koi
barahna jism tanha.i mire pahlu men soti hai
ye ankhen roz apne ansuon ke surḳh resham se
naya kuchh ḳhvab bunti hai koi sapna sanjoti hai
lahu men tairne lagta hai jab vo chand sa chehra
hava-e-dard siine men koi neza chubhoti hai
ye shahr-e-raftagan hai ab yahan koi nahin aata
ye kis ke paaon ki aahaT mujhe mahsus hoti hai
burida-sar paḌa hai kushta-e-ummid sahra men
udasi ḳhaak par baiThi hui anchal bhigoti he
Leave a Reply