Zahid Chaudhry
chaman men sair-e-gul ko jab kabhi vo mah-jabin nikle
miri tar-e-rag-e-jan se sada-e-afrin nikle
samajh jaata huun fauran kya hai matlab lan-tarani ka
miri ḳhvahish pe jab parde se vo parda-nashin nikle
falak ne jab kiya hamla miri shaḳh-e-nasheman par
jo dushman samne aa.e vo apne ham-nashin nikle
vo jin se shahd manga tha unhon ne zahr de Daala
jinhen samjha tha main hamdam vo mar-e-astin nikle
main jab un doston ki be-ruḳhi par ghaur karta huun
mire gham-ḳhana-e-dil se fugan-e-atishin nikle
tiri mahfil men har bahrupiye ka hai maqam uncha
haqiqat men jo ahl-e-dil hain vo uzlat-guzin nikle
farogh-e-ilm-e-be-qadri ki halat men nahin mumkin
ḳhas-o-ḳhashak hone ko sadaf se kyuun nagin nikle
jinhon ne khet lahra.e hain apne ḳhuun pasine se
ajab turfa hai vo mardan-e-mehnat be-zamin nikle
guzare main ne jo lamhat aghosh-e-tasavvur men
vo meri zindagi ke roz-o-shab men behtarin nikle
main apni abru-mandi men pa-mardi ka paikar huun
main vo aadam nahin jo chhoḌ kar ḳhuld-e-barin nikle
vo mai-noshi men karte hain imamat but-paraston ki
janab-e-shaiḳh mai-ḳhane men bhi masnad-nashin nikle
Leave a Reply