duniya apni manzil pahunchi tum ghar men bezar paḌe
tum se kis ko ishq hua hai tum pe ḳhuda ki maar paḌe
dil ki baton men aa jaana jiite ji mar jaana hai
ham us ke kahne men aa.e kitne din bimar paḌe
gul ya gulshan se laḌ jaana khel hai apni nazron ka
aisi ghaḌi allah na laa.e jab dil se takrar paḌe
gar na sadaf se bahar aate ik din moti ban jaate
kam-zarfi ne ḳhvar kiya hai sahil par ho baar paḌe
hijr ki muddat dard ke lamhe kya kya ma.ani rakhte hain
ye sab baten vo dil jaane jis par gham ka baar paḌe
duniya taj kar ishq ke raste aa.e vo bhi sahl paḌa
‘vajd’ ab us raste par jaao jo rasta dushvar paḌe
Leave a Reply