Sar Mera kaT Ke Pachhtaiyega

sar mirā kaaT ke pachhtā.iyegā

kis kī phir jhūTī qasam khā.iyegā

thaam luuñ dil ko zarā hāthoñ se

abhī pahlū se na uTh jā.iyegā

kahiye yārān-e-adam kyā guzrī

kuchh lab-e-gor se farmā.iyegā

yūsuf-e-husn agar ġham hogā

aap yāqūb nazar ā.iyegā

kar ke isbāt-e-dahan kījiye vasf

dekhiye muñh kī abhī khā.iyegā

kam bhī dene meñ bahut fā.eda hai

bosa ik dījiye das pā.iyegā

ḳhat pe ḳhat likhi.yegā ai shāh-savār

ghoḌī kāġhaz kī bhī dauḌā.iyegā

mardum-e-chashm se aa.e jo hijāb

aañkh ke parde meñ chhup jā.iyegā

kyā garebāñ ne galā ghoñTā hai

idhar ai dast-e-junūñ ā.iyegā

kah ke paañv se chale yaar ke ghar

ham jo uThne lageñ so jā.iyegā

kah ke ye tum ho baḌe har baabe

dar-ba-dar kyā mujhe phirvā.iyegā

kyuuñ banāvaT se ajī rote haiñ aap

jhūTe motī kise dikhlā.iyegā

jaam saaqī se jo māñgā to kahā

bhar ke ashk aañkh meñ pī jā.iyegā

mus.haf-e-ruḳh kī qasam meñ hai maza

ham se qur.ān ye uThvā.iyegā

ḳhat ġhulāmī kā nahīñ ai yūsuf

ḳhat jo niklā hai na sharmā.iyegā

ham ne yūsuf jo kahā kyuuñ bigḌe

mol legā koī bik jā.iyegā

hazrat-e-ka.aba jo ban jā.iye arsh

dil kī vus.at na kabhī pā.iyegā

ham bhī aa nikleñge masjid meñ ‘vazīr’

ḳhisht-e-ḳhum le ke jo banvā.iyegā

Leave a Comment