Poet
sar mira kaaT ke pachhta.iyega
kis ki phir jhuTi qasam kha.iyega
thaam luun dil ko zara hathon se
abhi pahlu se na uTh ja.iyega
kahiye yaran-e-adam kya guzri
kuchh lab-e-gor se farma.iyega
yusuf-e-husn agar gham hoga
aap yaqub nazar a.iyega
kar ke isbat-e-dahan kijiye vasf
dekhiye munh ki abhi kha.iyega
kam bhi dene men bahut fa.eda hai
bosa ik dijiye das pa.iyega
ḳhat pe ḳhat likhi.yega ai shah-savar
ghoḌi kaghaz ki bhi dauḌa.iyega
mardum-e-chashm se aa.e jo hijab
aankh ke parde men chhup ja.iyega
kya gareban ne gala ghonTa hai
idhar ai dast-e-junun a.iyega
kah ke paanv se chale yaar ke ghar
ham jo uThne lagen so ja.iyega
kah ke ye tum ho baḌe har baabe
dar-ba-dar kya mujhe phirva.iyega
kyuun banavaT se aji rote hain aap
jhuTe moti kise dikhla.iyega
jaam saaqi se jo manga to kaha
bhar ke ashk aankh men pi ja.iyega
mus.haf-e-ruḳh ki qasam men hai maza
ham se qur.an ye uThva.iyega
ḳhat ghulami ka nahin ai yusuf
ḳhat jo nikla hai na sharma.iyega
ham ne yusuf jo kaha kyuun bigḌe
mol lega koi bik ja.iyega
hazrat-e-ka.aba jo ban ja.iye arsh
dil ki vus.at na kabhi pa.iyega
ham bhi aa niklenge masjid men ‘vazir’
ḳhisht-e-ḳhum le ke jo banva.iyega
Leave a Reply