Poet
laakh mujhe dosh pe sar chahiye
sail-e-bala ko mira ghar chahiye
zad-e-safar se kahin kaTti hai raah
dil men faqat shauq-e-safar chahiye
ḳhair ho tabani-e-ḳhurshid ki
shab ke dularon ko sahar chahiye
ab ye talab hai ki havas chhoḌiye
peḌ nahin mujh ko samar chahiye
mangte hain vo bhi zamin se murad
su-e-falak jin ki nazar chahiye
ab unhen sahil na Dubo de jinhen
paar utarne ko bhanvar chahiye
mujh ko to hai ḳhana-ḳharabi pasand
aap kahen kis liye ghar chahiye
mujh sa bhi me.ar-talab kaun hai
dukh bhi mujhe koi amar chahiye
kuchh nahin aata to ḳhushamad hi siikh
haath men koi to hunar chahiye
puchh to luun rahzan-e-vaqt se
meri kala ya mira sar chahiye
tegh ki ‘rashid’ thi zarurat mujhe
main ye samajhta tha sipar chahiye
Leave a Reply