Ameer Minai
ham-sar-e-zulf qad-e-hur-e-shamail thahra
laam ka khuub alif madd-e-muqabil thahra
dida-e-tar se jo daman men gira dil thahra
bahte bahte ye safina lab-e-sahil thahra
ki nazar ru-e-kitabi pe to kuchh dil thahra
maktab-e-shauq bhi quran ki manzil thahra
nighat-e-gul se pareshan hua us ka dimagh
khanda-e-gul na hua shor-e-anadil thahra
najd se qais jo aaya mare zindan ki taraf
der tak gosh-bar-avaz-e-salasil thahra
husn jis tifl ka chamka vo hua bais-e-qatl
jis ne talvar sambhali mira qatil thahra
khat jo nikla rukh-e-janan pe mila bosa-e-khal
yahi daana faqat is kisht ka hasil thahra
alam ik nuqta jo mashhur tha ai josh-e-junun
ghaur se ki jo nazar nuqta-e-batil thahra
duur jab tak the tadapta tha men kaisa kaisa
paas aa kar vo jo thahre to mira dil thahra
kasrat-e-dagh se gul-dasta bana dil to kya
zinat-e-bagh na araish-e-mahfil thahra
daudta qais bhi aata hai nihayat hi qarib
ik zara naaqe ko ai sahib-e-mahmil thahra
dam jo betab tha muddat se mire siine men
tegh-e-qatil ke tale kuchh dam-e-bismil thahra
ham badi duur se aae hain tumhara hai ye haal
ghar se darvaze tak aana kai manzil thahra
ab tak aati hai sada turbat-e-laila se ‘amir’
sarban ab to khuda ke liye mahmil thahra
Leave a Reply