Sabir Waseem
karta hai koi aur bhi girya mire dil men
rahta hai koi aur bhi mujh sa mire dil men
vo mil gaya phir bhi ye lagatar udasi
shayad hai koi aur bhi dhaḌka mire dil men
ik ranj men Duuba hua be-nam musafir
aaya tha baḌi duur se Thahra mire dil men
jis shaam ko bhule hue ik umr hui thi
chamka hai usi shaam ka taara mire dil men
ik huuk si uThti hai sar-e-bam-e-tamanna
vo meri ḳhushi se kabhi rahta mire dil men
aa.e hain yahan tak to chalo us se bhi mil len
ye dhyan bhi ik baar to aaya mire dil men
jis aag ko kahte hain qayamat se nahin kam
bahta hai usi aag ka dariya mire dil men
Leave a Reply