dil-e-hazin ko tamanna hai muskurane ki
ye rut ḳhushi ki hai ya riit hai zamane ki
bana ga.iin use pechida nit-na.i sharhen
khuli hui thi haqiqat mire fasane ki
haram ke paas pahunchte hi thak ke baiTh ga.e
vagarna raah to li thi sharab-ḳhane ki
kisi ke saya-e-gesu ki baat chhiḌti hai
mire qarib rahen gardishen zamane ki
main tere gham ka bhi thoḌa sa ja.eza le luun
kabhi mile mujhe fursat jo muskurane ki
sameT len mah o ḳhurshid raushni apni
salahiyat hai zamin men bhi jagmagane ki
bhala ‘imam’ tahajjud guzar kya janen
ki raat kitni hasin hai sharab-ḳhane ki
Leave a Reply