us shokh se milte hi hui apni nazar tez
hai mehr-e-darakhshan ki shuaon ka asar tez
vo ped jo tezab se sairab hua tha
us ped ka hone laga har ek samar tez
vo manzil-e-maqsud pe pahunchega yaqinan
jo raah men chalta rahe be-khauf-o-khatar tez
deta hai jidhar un ko mafad apna dikhai
arbab-e-havas shauq se badhte hain udhar tez
be-nur na kar jaae fasadat ki andhi
lau ghar ke charaghon ki zara aur bhi kar tez
asar qayamat ke nazar aate hain ‘asi’
is daur men dekha gaya har ek bashar tez