Biswin Sadi Ke Hum Shair-E-Pareshan Hain

Bano Tahira Sayeed

bisvin sadi ke ham sha.ir-e-pareshan hain

mas.alon men uljhe hain fikr-o-gham men ghaltan hain

Duub kar ubhar aa.e maut se gale mil kar

apni saḳht-jani ke ḳhud hi ham nigahban hain

ham to Thahre divane ham to Thahre sahra.i

ahl-e-fahm-o-danish ke chaak kyuun gareban hain

kab hisab manga tha aap ki jafaon ka

kyuun jhuki jhuki nazren kis liye pasheman hain

aaj tak hai gham taaza dost se bichhaḌne ka

ab bhi ankhen roti hain zaḳhm-e-dil-farozan hain

sab ke ham rahe apne kaun hai magar apna

DhunDhte hain apnon ko ham bhi kitne nadan hain

‘tahira’ zamane ki karvaTon ka kya kahna

honge ye bhi virane aaj jo gulistan hain