inqilab-e-sahar-o-sham ki kuchh baat karo
dosto gardish-e-ayyam ki kuchh baat karo
jam-o-mina to kahin aur se le a.enge
mai-kasho saqi-e-gulfam ki kuchh baat karo
ghair ki sub.h-e-daraḳhshan ka tasavvur kab tak
apni kajla.i hui shaam ki kuchh baat karo
phir jalana mah-o-ḳhurshid ki mahfil men charagh
pahle apne hi dar-o-bam ki kuchh baat karo
kya ye TuuTe hue paimane liye baiThe ho
bada-nosho sitam-e-am ki kuchh baat karo
zikr-e-firdaus-o-iram kal pe uTha rakhte hain
aaj to ariz-e-asnam ki kuchh baat karo
main to ḳhair apni vafaon pe huun nazan lekin
vo jo tum par hai us ilzam ki kuchh baat karo
talḳhi-e-kam-o-dahan se kahin gham dhulte hain
zalimo talḳhi-e-ayyam ki kuchh baat karo
itna sannaTa ki ehsas ka dam ghuTta hai
sub.h ka zikr karo shaam ki kuchh baat karo
vahi ‘arshad’ ki jalata hai jo andhi men charagh
haan usi sha.ir-e-badnam ki kuchh baat karo
Leave a Reply