Asim Wasti
hai mustaqil yahi ehsas kuchh kami si hai
talash men hai nazar dil men bekali si hai
kisi bhi kaam men lagta nahin hai dil mera
baḌe dinon se tabi.at bujhi bujhi si hai
baḌi ajiib udasi hai muskurata huun
jo aaj kal miri halat hai sha.iri si hai
guzar rahe hain shab o roz be-sabab mere
ye zindagi to nahin sirf zindagi si hai
thaki to ek mohabbat ne muund li ankhen
har ek niind se ab meri dushmani si hai
tire baghair kahan hai sukun kya aram
kahin rahun miri taklif beghari si hai
nahin vo sham-e-mohabbat rahi to phir ‘asim’
ye kis dua se mire ghar men raushni si hai
Leave a Reply