fa.eda ham ko miTane se bhala kya nikla
sar se sauda na gaya dil se na jazba nikla
be-maza aise hue talḳhi-e-halat se ham
shahd ka za.iqa chakkha to vo kaḌva nikla
dost jitne the vo sab ho ga.e aapas men harif
kaisi mahfil thi jo nikla vo akela nikla
dil ke har TukḌe men mahfuz raha aks tira
aa.ina TuuT ke bhi a.ina-ḳhana nikla
sar-e-rahe na sahi haan sar-e-maqtal hi sahi
gham se milne ka chalo kuchh to bahana nikla
qahqahon ka jo samundar tha har ik mahfil men
ghar men vo shaḳhs udasi ka jazira nikla
chashm-e-ahbab bhi nichi hai to main bhi nadim
jis kuen men mujhe phenka tha vo andha nikla
hal-e-dil ḳhud hi kaha ḳhud hi suna hai ‘saghar’
har muḳhatab miri taqdir se bahra nikla
Leave a Reply