ḳhvab dekhun koi mahtab lab-e-bam utre
yuun bhi ho jaa.e murad-e-dil-e-nakam utre
agle vaqton ki basharat se ho duniya raushan
asmanon se zamin par tira in.aam utre
yaad aa.e to khilen phuul chale purva.i
dard jaage to tira aks tah-e-jam utre
main charaghon se hamesha tiri biiti puchhun
bin bata.e tu mire ghar men sar-e-sham utre
main dua mangun kisi nek ghaḌi men ‘sahba’
us ka dukh mera muqaddar ho mire naam utre
Leave a Reply