khile hain phuul ki surat tire visal ke din
tire jamal ki raten tire khayal ke din
nafas nafas nai tahdariyon men zaat ki khoj
ajab hain tere badan tere khadd-o-khal ke din
ba-zauq-e-sher ba-jabr-e-maash yakja hain
mire uruuj ki raten mire zaval ke din
kharid baithe hain dhoke men jins-e-umr-e-daraz
hamen dikhae the maktab ne kuchh misal ke din
na hadse na tasalsul na rabt-e-umr kahin
bikhar ke rah gae lamhon men mah-o-sal ke din
main badhte badhte kisi roz tujh ko chhu leta
ki gin ke rakh diye tu ne miri majal ke din
ye tajrabat ki vusat ye qaid-e-saut-o-sada
na puchh kaise kade hain ye arz-e-hal ke din
Leave a Reply