surkh sahar se hai to bas itna sa gila ham logon ka
hijr charaghon men phir shab bhar khuun jala ham logon ka
ham vahshi the vahshat men bhi ghar se kabhi bahar na rahe
jangal jangal phir bhi kitna naam hua ham logon ka
aur to kuchh nuqsan hua ho khvab men yaad nahin hai magar
ek sitara zarb-e-sahar se tuut gaya ham logon ka
ye jo ham takhliq-e-jahan-e-nau men lage hain pagal hain
duur se ham ko dekhne vaale haath bata ham logon ka
bigde the bigde hi rahe aur umr guzari masti men
duniya duniya karne se jab kuchh na bana ham logon ka
khaak ki shohrat dekh ke ham bhi khaak hue the pal bhar ko
phir to taaqub karti rahi ik umr hava ham logon ka
shab bhar ik avaz banai sub.h hui to chikh pade
roz ka ik maamul hai ab to khvab-zada ham logon ka
Leave a Reply