ankhon men raha dil men utar kar nahin dekha
kashti ke musafir ne samundar nahin dekha
be-vaqt agar jaunga sab chaunk padenge
ik umr hui din men kabhi ghar nahin dekha
jis din se chala huun miri manzil pe nazar hai
ankhon ne kabhi miil ka patthar nahin dekha
ye phuul mujhe koi virasat men mile hain
tum ne mira kanton bhara bistar nahin dekha
yaron ki mohabbat ka yaqin kar liya main ne
phulon men chhupaya hua khanjar nahin dekha
mahbub ka ghar ho ki buzurgon ki zaminen
jo chhod diya phir use mud kar nahin dekha
khat aisa likha hai ki nagine se jade hain
vo haath ki jis ne koi zevar nahin dekha
patthar mujhe kahta hai mira chahne vaala
main mom huun us ne mujhe chhu kar nahin dekha
Leave a Reply