kaun aa gayā ye hashr kā sāmāñ liye hue
dāman meñ apne merā garebāñ liye hue
har ek ġham hai aish kā unvāñ liye hue
shām-e-ḳhizāñ hai sub.h-e-bahārāñ liye hue
sajda hai merā zauq-e-farāvāñ liye hue
uThegā ab to sar dar-e-jānāñ liye hue
ba.ad-e-rihā.ī bhī na maiñ zindāñ se jā.ūñgā
baiThā rahūñgā izzat-e-zindāñ liye hue
ab bhī na ḳhanda-lab hoñ mire zaḳhm-hā-e-dil
vo muskurā rahe haiñ namak-dāñ liye hue
ai chāra-sāz baiTh ye chāragarī bhī dekh
uTThegā merā dard hī darmāñ liye hue
rangīnī-e-tabassum-e-paiham na pūchhiye
jaise vo aa rahe hoñ gulistāñ liye hue
aisā bhī kaash aa.e mohabbat meñ inqalāb
vo aa.eñ merī diid kā armāñ liye hue
kaisī bahār aa.ī hai ab ke ba-rang-e-nau
har ek gul hai ḳhūn-e-shahīdāñ liye hue
imkān-e-sahv ham se bhī mumkin hai ai ‘shifā’
insāniyat kā ham bhī haiñ imkāñ liye hue