Waseem Tashif
ba.az auqat faraghat men ik aisa lamha aata hai
jis men ham aison ko achchha-ḳhasa rona aata hai
sab us shaḳhs se mil kar bilkul taza-dam ho jaate hain
phir us din tasvir men sab ka chehra achchha aata hai
baagh se phuul churane vaali laḌki ko ye kya ma.alum
us ke qadmon ki har chaap pe phuul ko khilna aata hai
ham ye baat baḌe-buḌhon se aksar sunte aa.e hain
daa.en haath men khujli ho to jeb men paisa aata hai
jab bhi us ko rishte ki tasvir dikha.i jaati hai
us ke zehn men fauran mere jaisa laḌka aata hai
ham-sa.e ki unchi divaron se itna farq paḌa
pahle ghar men dhuup aa jaati thi ab saaya aata hai
is avaz ko sunne vaale kaan mubarak kahlate hain
un ankhon ko dekhne vaalo ḳhvab men dariya aata hai
Leave a Reply