qasida tujh se ghazal tujh se marsiya tujh se
har ek harf hua sahab-e-nava tujh se
zaban-kusha.i-e-gham se khuli kitab-e-ḳhayal
varaq varaq pe khula husn-e-mudda.a tujh se
zamin men phuuT paḌa chashma-e-junun-saman
gulon men sard paḌi atish-qaba tujh se
kahan se zud-faramoshiyon ki ḳhu sikhi
jo dekhiye to na thi barq-ashna tujh se
pahunch to jaata sar-e-ḳhema-e-vafa-abad
magar hai sust qadam umr-e-tez-pa tujh se
kiye the kaam jo dil ke sipurd un ko bhi
dimagh-e-dahr se baḌh kar hai ab gila tujh se
hua jo kucha-e-tanqid men ‘hasan’ rusva
milaya ghaib ne ‘ghalib’ ka silsila tujh se
Leave a Reply