har ik fan men yaqinan taaq hai vo
azal hi se baḌa ḳhallaq hai vo
jise tum ne kaha tha samm-e-qatil
azizam asl men tiryaq hai vo
use sang-e-tanaffur se na ragḌo
sulag uTThega dil chaqmaq hai vo
ghurub-e-sidq ka ḳhadsha hai batil
kahan minnat-kash-e-ishraq hai vo
jari ibn-e-sharafat nek laḌka
qabile bhar men lekin aaq hai vo
ba-batin aa.ina hai qalb us ka
ba-zahir sarvar-e-fussaq hai vo
kahan se ehtisab-e-nafs hoga
hisab-e-dostan be-baq hai vo
muqaffal ghar khula hai ik daricha
kisi ki diid ka mushtaq hai vo
jahan rakkhi hai sham-e-be-sabati
miri divar-e-jan ka taaq hai vo
aza.em jis se paspa hon safar men
amiir us ko kahen qazzaq hai vo
havas bhi kya koi ḳhasta sutun hai
daraḳht-e-narasa ki saaq hai vo
banaya us ne sab ko juft ‘rahi’
magar har zaviye se taaq hai vo
Leave a Reply