Iqbal Sajid
mila to hadisa kuchh aisa dil ḳharash hua
vo TuuT phuuT ke bikhra main paash paash hua
tamam umr hi apne ḳhilaf sazish ki
vo ehtiyat ki ḳhud par na raaz faash hua
sitam to ye hai vo farhad-e-vaqt hai jis ne
na ju-e-shir nikali na but-tarash hua
yahi to dukh hai bura.i bhi qa.ede se na ki
na main sharif raha aur na bad-ma.ash hua
ho ek baar ka rona to ro.uun bhi dil ko
ye aa.ina to ka.i baar paash paash hua
bala ka habs tha ‘sajid’ hava ki basti men
chali jo saans ki aari main qaash qaash hua
Leave a Reply