Muneer Niyazi
apni hi tegh-e-ada se aap ghayal ho gaya
chand ne paani men dekha aur pagal ho gaya
vo hava thi shaam hi se raste khali ho gae
vo ghata barsi ki saara shahr jal-thal ho gaya
main akela aur safar ki shaam rangon men dhali
phir ye manzar meri nazron se bhi ojhal ho gaya
ab kahan hoga vo aur hoga bhi to vaisa kahan
soch kar ye baat ji kuchh aur bojhal ho gaya
husn ki dahshat ajab thi vasl ki shab men ‘munir’
haath jaise intiha-e-shauq se shal ho gaya
Leave a Reply