Ahmad Mushtaq
dhadakti rahti hai dil men talab koi na koi
pukarta hai mujhe roz-o-shab koi na koi
shab-e-alam tire saada dilon pe kya guzri
sahar hui to sunaega sab koi na koi
zaban band hai ankhon ke band rahne tak
khulegi aankh to kholega lab koi na koi
hava-e-saz-e-alam laakh ehtiyat kare
laraz hi uthta hai tar-e-tarab koi na koi
ghane banon men bhi rasta nikal hi aata hai
bana hi deti hai qudrat sabab koi na koi
Leave a Reply