kaifi-azmi

Bewa Ki Khud-Kushi

ye andheri raat ye saari faza soi hui

patti patti manzar-e-khamosh men khoi hui

maujzan hai bahr-e-zulmat tirgi ka josh hai

shaam hi se aaj qindil-e-falak khamosh hai

chand taare hain bhi to be-nur pathrae hue

jaise baasi haar men hon phuul kumhlae hue

khap gaya hai yuun ghata men chandni ka saaf rang

jis tarah mayusiyon men dab ke rah jaae umang

umDi hai kaali ghata duniya Dubone ke liye

ya chali hai baal khole raanD rone ke liye

jitni hai gunjan basti utni hi viran hai

har gali khamosh hai har rasta sunsan hai

ik makan se bhi makin ki kuchh khabar milti nahin

chilmanen uthti nahin zanjir-e-dar hilti nahin

so rahe hain mast-o-be-khud ghar ke kul pir-o-javan

ho gai hain band husn-o-ishq men sargoshiyan

haan magar ik samt ik goshe men koi nauhagar

le rahi hai karvaton par karvaten dil thaam kar

dil sambhalta hi nahin hai sina-e-sad-chak men

phuul sa chehra ata hai bevgi ki khaak men

ud chali hai rang-e-rukh ban kar hayat-e-mustaar

ho raha hai qalb-e-murda men javani ka fishar

hasraten dam todti hain yaas ki aghosh men

saikdon shikve machalte hain lab-e-khamosh men

umr amada nahin murda-parasti ke liye

baar hai ye zinda mayyat dosh-e-hasti ke liye

chahti hai laakh qaabu dil pe paati hi nahin

hae-re zalim javani bas men aati hi nahin

tharthara kar girti hai jab suune bistar par nazar

le ke ik karvat patak deti hai vo takiya pe sir

jab khanak uthti hain soti ladkiyon ki chudiyan

aah ban kar uthne lagta hai kaleja se dhuan

ho gai beva ki khatir niind bhi jaise haram

mukhtasar sa ahd-e-vaslat de gaya soz-e-davam

dopahar ki chhanv daur-e-shadmani ho gaya

pyaas bhi bujhne na paai khatm paani ho gaya

le rahi hai karvaton par karvaten ba-iztirar

aag men paara hai ya bistar pe jism-e-be-qarar

pad gai ik aah kar ke ro ke uth baithi kabhi

ungliyon men le ke zulf-e-kham-ba-kham ainthi kabhi

aa ke honton par kabhi mayus aahen tham gaiin

aur kabhi suuni kalai par nigahen jam gaiin

itni duniya men kahin apni jagah paati nahin

yaas is had ki ki shauhar ki bhi yaad aati nahin

aa rahe hain yaad paiham saas nandon ke suluk

phat raha hai gham se siina uth rahi hai dil men huuk

apni maan bahnon ka bhi ankhen churana yaad hai

aisi duniya men kisi ka chhod jaana yaad hai

baghban to qabr men hai kaun ab dekhe bahar

khud usi ko tiir us ke karne vaale hain shikar

jab nazar aata nahin deta koi bekas ka saath

zahr ki shishi ki janib khud-ba-khud badhta hai haath

dil tadap kar kah raha hai jald is duniya ko chhod

chudiyan todin to phir zanjir-e-hasti ko bhi tod

dam agar nikla to khoi zindagi mil jaegi

ye nahin to khair tanha qabr hi mil jaegi

vaan tujhe zillat ki nazron se na dekhega koi

chahe hansna chahe rona phir na rokega koi

vaan sab ahl-e-dard hain sab sahab-e-insaf hain

rahbar aage ja chuka rahen bhi teri saaf hain

dil inhin baton men uljha tha ki dam ghabra gaya

haath le kar zahr ki shishi labon tak aa gaya

tilmilati aankh jhapkati jhijakti hanpti

pi gai kul zahr akhir thartharati kanpti

maut ne jhatka diya kul uzv Dhile ho gae

saans ukhdi, nabz Dubi, hont niile ho gae

aankh jhapki ashk tapka hichki aai kho gai

maut ki aghosh men ik aah bhar kar so gai

aur kar ik aah sulge hind ki rasmon ka daam

ai javana-marg beva tujh pe ‘kaifi’ ka salam

More Poems

Leave a Comment