Fariyaad-E-Junun Aur Hai Bulbul Ki Fughan Aur

fariyad-e-junun aur hai bulbul ki fughan aur

sahra ki zaban aur hai gulshan ki zaban aur

kat jaae zaban teri to ho garm zaban aur hai

allah ne di hai tujhe ai shama zaban aur

jannat bhi hai dozakh bhi hai siine men hamare

ye dagh-e-nihan aur hai ye soz-e-nihan aur

ho jaae sach iflas men sunta huun rahega

do-char mahine abhi mah-e-ramazan aur

aghaz-e-mohabbat men ye dil khuun hua hai

roenge abhi dida-e-khun-naba-fishan aur

duniya men ab aisa qadar-andaz nahin hai

hote hi hadaf dil ke chadhi un ki kaman aur

jo piite hain piite nahin vo bhi ramzan men

sunta huun koi band hui mai ki dukan aur

achchha hai rahen ja ke lag donon-jahan se

ushshaq ke rahne ko bane ek jahan aur

piine ka maza jab hai ki munh khum se laga hai

mujh rind se saaqi ye kahe jaae ki haan aur

nikla hai mira naam ki benam-o-nishan huun

mujh sa bhi na hoga koi benam-o-nishan aur

sunta huun musalmanon men ab maang bahut hai

Darta huun mai-e-nab na ho jaae garan aur

pahunche dar-o-divar ko nuqsan to kya gham

rone ke liye lenge kirae ka makan aur

tez atish-e-sayyal hai pahle se ziyada

ab aag lagae na zara pir-e-mughan aur

di ham ne jagah dil ko bhi ankhon ke barabar

ankhon men samate nahin vo ho ke javan aur

marne ka ‘riyaz’ apne zara naam na lena

jiina abhi mar-mar ke tujhe hai miri jaan aur

Leave a Comment