Shahram Sarmadi
ḳhala sa Thahra hua hai ye char-su kaisa
ujaaḌ ho gaya ik shahr-e-rang-o-bu kaisa
tamam halqa-e-ḳhvab-o-ḳhayal hairan hai
savad-e-chashm men aaya ye mah-ru kaisa
kabhi jo fursat-e-yak-lamha bhi mile to dekh
ki dasht-e-yad men bikhra paḌa hai tu kaisa
agarche shora hi shora sab ilaqa-e-dil
tujhe rakkha hai magar sabz o pur-numu kaisa
sara-e-dil men ka.i din se shaam hote hi
dhuan sa phailne lagta hai ku-ba-ku kaisa
zara jo sochen to ye mas.ala bhi hal ho jaa.e
ki hona chahiye ab rang-e-arzu kaisa
Leave a Reply