main chup rahun to goya ranj-o-gham-e-nihan huun
bolun to sar se pa tak hasrat ki dastan huun
masrur ho tu mujh se main tujh se shadman huun
tu mera mehman ho main tera mezban huun
kahti hai un ki masti hosh aae to main puchhun
ai be-khudi bata de is vaqt main kahan huun
irshad par nazar hai khamosh huun ki goya
chaho to be-zaban huun chaho to ba-zaban huun
jaan ghul chuki hai gham men ik tan hai vo bhi mohmal
maani nahin hain bilkul mujh men agar bayan huun
main huun junun ke hathon makhluq ka tamasha
na-mehrban huun khud par duniya pe mehrban huun
allah-re us ki chaukhat hai bosa-gah-e-alam
kahta hai sang-e-asvad main sang-e-astan huun
kahta hai mera naala lab tak main aate aate
sau ja thama huun rah men is darja na-tavan huun
nafrat ho jis ko mujh se milne ka us se hasil
nazron men kyuun subuk huun khatir pe kyuun giran huun
muddat men tum mile ho kyuun zikr-e-ghair aae
main apne saae se bhi khalvat men bad-guman huun
chup rah gaya payami lekin ye khair guzri
khat ne kaha ki suniye ‘parvin’ ki main zaban huun
Leave a Reply