Parde Meri Nigah Ke Bhi Darmiyan Na The

Ashraf Rafi

parde miri nigah ke bhi darmiyan na the

kya kahiye un ke jalve kahan the kahan na the

jis raste se le ga.i thi mujh ko be-ḳhudi

us raah men kisi ke qadam ke nishan na the

raz-ashna hai meri nazar ya phir aa.ina

varna vo apne husn ke ḳhud raz-dan na the

kuchh be-sada se lafz nazar kah ga.i zarur

maana lab-e-ḳhamosh rahin-e-bayan na the

aa.e to yuun ki jaise hamesha the mehrban

bhule to yuun ki jaise kabhi mehrban na the

‘ashraf’ fareb-e-zist hai kab imtihan se kam

is ke siva to aur yahan imtihan na the