Ismail Merathi
shab-e-zindagani sahar ho gai
bahr-kaif achchhi basar ho gai
na samjhe ki shab kyuun sahar ho gai
idhar ki zamin sab udhar ho gai
zamane ki bigdi kuchh aisi hava
ki be-ghairati bhi hunar ho gai
amaid ne ki vaza jo ikhtiyar
vahi sab ko madd-e-nazar ho gai
gae jo nikal dam-e-tazvir se
hazimat hi in ki zafar ho gai
zamin munqalib asman charkh-zan
iqamat bhi ham ko safar ho gai
mita daliye lauh-e-dil se ghubar
kisi se khata bhi agar ho gai
ba-rah-e-karam us ko tai kijiye
jo an-ban kisi baat par ho gai
na karna tha bizzid madava-e-gham
badi chuuk ai chara-gar ho gai
ye hangama-ara hain sab be-khabar
vo chup hain jinhen kuchh khabar ho gai
Leave a Reply