hai ye mar miTne ka in.aam tumhen kya ma.alum
lazzat-e-dashna-e-ba-dnam tumhen kya ma.alum
tum ne dekhi hai faqat meri pareshan-hali
mujh pe kya kya hue ikram tumhen kya ma.alum
hairati ho ke uTha.e hue dil phirte hain
is ke lag jaane ka anjam tumhen kya ma.alum
jazba-e-ḳhvahish-o-ehsas ki is baazi men
kaun ho ja.ega nakam tumhen kya ma.alum
dekhte ho mujhe par-basta to hans dete ho
hai yahan kaun tah-e-dam tumhen kya ma.alum
vaqt ka rang badalte nahin dekha tum ne
surat-e-gardish-e-ayyam tumhen kya ma.alum
mausam-e-mehr ke do-char baras dekhe hain
saḳhti-e-mausam-e-alam tumhen kya ma.alum
Leave a Reply