Khan Janbaz
sayyad bata to sahi is jaal men kya hai
gar dil nahin mera to tire baal men kya hai
vaise to ḳhud is chand ka qaa.il huun main lekin
ik raushni ko chhoḌ kar is thaal men kya hai
majnun hi bata sakta hai laila ki fazilat
ya sohni se puchh ki mahival men kya hai
main hashr ke maidan men kah dunga mohabbat
puchhega ḳhuda jab tire a.amal men kya hai
ji karta hai un ko tiri tasvir dikha duun
jo puchhte hain mujh se ki bangal men kya hai
allah bana de mire ashkon ko kabutar
sab puchh rahe hain tire rumal men kya hai
Leave a Reply