mere bhi kuchh gile the magar raat ho ga.i
kuchh tum bhi ki rahe the magar raat ho ga.i
duniya se duur apne barabar khaḌe rahe
ḳhvabon men jagte the magar raat ho ga.i
asab sun rahe the thakavaT ki guftugu
uljhan thi mas.ale the magar raat ho ga.i
ankhon ki raushni men andhere bikhar ga.e
ḳheme se kuchh jale the magar raat ho ga.i
ai dil ai mere dil ye suna hai ki shaam ko
ghar se vo chal paḌe the magar raat ho ga.i
aisi bhi kya vafa ki kahani thi ro paḌe
kuchh silsile chale the magar raat ho ga.i
kuchh ziine iḳhityar ke chaḌhne laga tha main
kuchh vo utar rahe the magar raat ho ga.i
dushman ki dosti ne masafat sameT li
qadmon men raste the magar raat ho ga.i
‘sahil’ fareb-e-fikr hai duniya ki dastan
kuchh raaz khul chale the magar raat ho ga.i
Leave a Reply