Abdul Ahad Saaz
mizaj-e-sahal-talab apna rukhsaten mange
sabat-e-fan magar ai dil azimaten mange
ufuq pe husn-e-ada ke tulu-e-mehr-e-khayal
faza-e-sher sahar ki latafaten mange
musir hai aql ki mantiq men aae uqda-e-jan
qadam qadam pe magar dil basharaten mange
nai udaan ko kam hain ye zauq ke shahpar
nai havaon ka har kham zihanaten mange
shuur ke qad-o-qamat pe hai nazar kis ki
ye farba-chashm zamana jasamaten mange
nafis o sahl nahin vaz-e-sher ki tadrij
har ek soch digar-gun si halaten mange
sukun-e-tul-e-vafa hai talab ki kotahi
ki lams-e-yad dhadakti jasaraten mange
shua-e-mehr se dhul jaaen jaise maah o najm
tira khayal anokhi taharaten mange
na puchh ‘saz’ ko vo to sarab valon se
phire hai kasa-e-dil men haqiqaten mange
Leave a Reply