Kunwar Bechain
is tarah mil ki mulaqat adhuri na rahe
zindagi dekh koi baat adhuri na rahe
badalon ki tarah aa.e ho to khul kar barso
dekho is baar ki barsat adhuri na rahe
mera har ashk chala aaya barati ban kar
jis se ye dard ki barat adhuri na rahe
paas aa jaana agar chand kabhi chhup jaa.e
mere jivan ki koi raat adhuri na rahe
meri koshish hai ki main us se kuchh aise bolun
lafz nikle na koi baat adhuri na rahe
tujh pe dil hai to ‘kunvar’ de de kisi ke dil ko
jis se dil ki bhi ye saughat adhuri na rahe
Leave a Reply