Ashk-E-Gham Wo Hai Jo Duniya Ko Dikha Bhi Na Sakun

Poet

ashk-e-gham vo hai jo duniya ko dikha bhi na sakun

aur gir jaa.e zamin par to uTha bhi na sakun

ye mire gham ka fasana hai rahega lab par

teri rudad nahin hai ki suna bhi na sakun

partav-e-husn huun is vaste mahdud huun main

husn ho ja.un to duniya men sama bhi na sakun

tez kuchh vaqt ki raftar nahin hai lekin

tum agar saath na do paanv baḌha bhi na sakun

ab vahi log bigaḌi hai jinhon ne qismat

chahte hain ki main taqdir bana bhi na sakun

aaj nakam sahi kal ka bharosa hai mujhe

ishq phir kya jo tujhe apna bana bhi na sakun

dil kahan ek siyah-ḳhana hai ranj-o-gham ka

is qadar daagh lage hain ki miTa bhi na sakun

dil ki gahra.i se ai dost zara kah to sahi

jaan aisi to nahin jis ko ganva bhi na sakun

umr guzri kabhi saaqi ne ‘falak’ ye na kaha

itni pi le ki tujhe hosh men la bhi na sakun