Dil Ye Kahta Hai Ki Milne Ki Koi Baat Kare

Shakeel Haidar

dil ye kahta hai ki milne ki koi baat kare

koi to aa.e jo tajdid-e-mulaqat kare

hai bahut tira-sifat chadar-e-ḳhurshid yahan

din ko aghosh men bhar le to use raat kare

yaad hai harf-e-dua bahr-e-munajat magar

roz-o-shab us ke liye kaun munajat kare

us ke jaane pe to ḳhamosh rahegi ye zaban

dil ka malum nahin kitne savalat kare

rashk aata hai bahut us ki maharat pe mujhe

meri har jiit ko vo shoḳh-ada maat kare

ḳhvab ta.abir-e-haqiqat men badal jaa.e agar

shab-gazida hi sahi phir bhi karamat kare

har kiran kitni siyah-baḳht nazar aane lage

tirgi jab bhi kabhi raushni ki baat kare

roz karta hai vo ghairon se mulaqat abas

us se kah do ki vo ab ḳhud se mulaqat kare

mai-kada achchha subu achchhe magar phir bhi ‘shakil’

zindagi kaise koi nazr-e-ḳharabat kare