kuchh laag kuchh lagav mohabbat men chahiye
donon tarah ka rang tabiat men chahiye
ye kya ki but bane hue baithe ho bazm men
kuchh be-takallufi bhi to khalvat men chahiye
vo ibtida-e-ishq men hasil hui mujhe
jo baat intiha-e-mohabbat men chahiye
aenge be-shumar farishte azaab ke
maidan-e-hashr ghair ki turbat men chahiye
kuchh to pade dabao dil-e-be-qarar par
paara bhara hua miri turbat men chahiye
mashuq ke kahe ka bura mante ho ‘dagh’
bardasht aadmi ki tabiat men chahiye