abdul-ahad-saaz

Azdawaji Zindagi Bhi Aur Tijarat Bhi Adab Bhi

azdavaji zindagi bhi aur tijarat bhi adab bhi

kitna kar-amad hai sab kuchh aur kaisa be-sabab bhi

jis ke ek ik harf-e-shirin ka asar hai zahr-agin

kya hikayat likh gae mere labon par us ke lab bhi

umr bhar tar-e-nafas ik hijr hi ka silsila hai

vo na mil paae agar to aur agar mil jaae tab bhi

log achchhe zindagi pyari hai duniya khubsurat

aah kaisi khush-kalami kar rahi hai ruh-e-shab bhi

lafz par mafhum us lamhe kuchh aisa multafit hai

jaise az-khud ho inayat bosa-e-lab be-talab bhi

na-tavan kam-zarf isyan kar-e-jahil aur kya kya

pyaar se mujh ko bulata hai vo mera khush-laqab bhi

ham bhi hain pabandi-e-iz.har se bezar lekin

kuchh saliqa to sukhan ka ho hunar ka koi Dhab bhi

naam nisbat milkiyyat kuchh bhi nahin baaqi agarche

‘saz’ us kuche men mera ghar hua karta hai ab bhi

More Poems

Leave a Comment