Farhat Ehsas
ḳhalal aaya na haqiqat men na afsana bana
main to lagta hai ki bekar hi divana bana
maar hi Daala tha sahil ke maraz ne mujh ko
ek sailab achanak hi shifa-ḳhana bana
jaise parchha.in bana.i ga.i har jism ke saath
usi andaz se har shahr ka virana bana
masjid-e-jism jise koi namazi na mila
vahin ik shaam miri ruuh ka mai-ḳhana bana
farhat-ehsas se aati thi sada-e-girya
aḳhir-kar vo duniya ka aza-ḳhana bana
Leave a Reply