Munawwar Rana
ye durveshon ki basti hai yahan aisa nahin hoga
libas-e-zindagi phat jaega maila nahin hoga
share-bazar men qimat uchhalti girti rahti hai
magar ye khun-e-muflis hai kabhi mahnga nahin hoga
tire ehsas ki inten lagi hain is imarat men
hamara ghar tire ghar se kabhi uncha nahin hoga
hamari dosti ke biich khud-gharzi bhi shamil hai
ye be-mausam ka phal hai ye bahut mitha nahin hoga
purane shahr ke logon men ik rasm-e-muravvat hai
hamare paas aa jaao kabhi dhoka nahin hoga
ye aisi chot hai jis ko hamesha dukhte rahna hai
ye aisa zakhm hai jo umr bhar achchha nahin hoga
Leave a Reply