sanson men rag-o-pai men samaya hai koi aur
hai ziist kisi aur ki jiita hai koi aur
ankhon ne basa.i hai koi aur hi surat
us dil ke nihan-ḳhane men Thahra hai koi aur
kya turfa tamasha hai ki us dil ki sada ko
sunta hai koi aur samajhta hai koi aur
ik aag hai jo dil men bujhi jaati hai har-pal
ḳhirman se jo uThta hai vo sho.ala hai koi aur
lashe hain kinare pe paḌe tishna-labon ke
jo pyaas bujhata hai vo dariya hai koi aur
har sub.h pe saaya sa hai kuchh talḳhi-e-shab ka
har shaam ko andesha-e-farda hai koi aur
ik bu-e-rifaqat si fazaon men hai ‘shahid’
is kucha-e-begana se guzra hai koi aur
Leave a Reply