abla-pa koi guzra tha jo pichhle san men
surkh kanton ki bahar aai hai ab ke ban men
dekhna rang-e-badan yaar ke pairahan men
chandni duudh si chhitki hai mire angan men
dekhna dida-varo amad-e-tufan to nahin
tapki hai dard ki ek buund mire daman men
main ham-aghosh-e-sanam tha magar a pir-e-haram
ye shikan kaise padi aap ke pairahan men
kuchh na kuchh aaj asiron ne kaha to hai zarur
ek ik gul se lipatti hai saba gulshan men
sahal itne bhi nahin ai sitam-ijad ki ham
thaam lete hain gareban divane-pan men
sar taslim nahin bazu-e-qatil ka javab
akhirash maare gae khud bhi masiha an men
ja rahe ho to zara dekhna tum bhi ‘majruh’
meri ankhen vahin zindan ke kisi rauzan men